تصدق ولا ماتصدق .. انا عاجز عن التفكير
تعال وشوف في عيني غيابك وش عمل فيني
حبيبي مابقى عندي صبر .. يتحمل التأخير
رحلت .. وعقبك الدنيا غلاها طاح من عيني
اجاوب اللي يسألني عن اخباري واقول بخير
وانا لاخير بغيابك .. ولاحاجه .. تهنيني
على طاريك كل لحظه .. ولا احتاج للتذكير
حريص القلب ماينسى عيونك ولاتوصيني
محد يقدر يعوضني لانك .. في عيوني غير
ومهما شفت انا الفرحه .. بدونك ماتسليني
وكيف الحال وشلوني .. جواب مايبي تغير
بدونك انت ماتضحك حياتي وترمش سنيني
مثل شاعر عجز يوصف شعوره وخانه التعبير
انا ضايع .. ولاادري من فراقك .. انا ويني
مثل طير كسر بعدك جناحه وماقدرت اطير
احاول ابتسم وانسى ولكن وش ينسيني ؟؟!!
اشوفك في صباحي انت معني ياصباح الخير
واشوفك في مسائي حلم وردي .. لاتصحيني
تصدق .. السهر يرسم عيوني ويتقن التصوير
ويشق النور في صفحة حياتي .. وماالاقيني
انام شلون ومشكلتي عجزت القى لها تدبير
طلبت النوم .. لحظاته وعيا النوم يعطيني
تغير وجهي .. من اول غيابك وابتدى التأثير
حبيبي .. من التعب كافي خذيت اللي يكفيني
يااغلى من رحل عني ياكل الحب والتقدير
تعااال ان كان لي عندك معزه وكان تغليني
تعال ان كنت تعشقني واذا فعلاً تبي لي الخير
تعال : ومدلي .. كف الوصل .. وآمد كفيني
اذا كان الجفا واجب بدى من قلبي التقصير
ابيك الحين .. ترجع لي ولاترجع تخليني
انا ما اقول اللي صار فيني ماهقيته يصير
لاني كنت .. (متأكد ) .. بأن البعد ( ينهييييييني )
